Европската унија денеска објави повик до компаниите што се дел од Европската економска област и од Западен Балкан да поднесат предлози за инвестициски проекти, со цел да се мобилизираат приватните инвестиции во балканскиот регион.
Целта е да се поддржи економскиот развој на регионот и неговата интеграција во Единствениот пазар на Европската унија.
Целта е да се поттикнат приватните инвестиции во развојот на инфраструктурата, економската диверзификација, зелената и дигиталната транзиција, како и интеграцијата во синџирот на вредности на ЕУ, со цел да се овозможи отворање нови работни места и намалување на економскиот јаз со ЕУ, во согласност со Планот за раст за Западен Балкан.
Приоритетните области на повикот вклучуваат зелена транзиција, интеграција во синџирите на индустриско снабдување или производство на ЕУ, критични суровини, одржлив транспорт, дигитална транзиција, одржлив туризам, развој на човечки капитал и финансирање со социјално влијание.
За да бидат подобни, инвестициските проекти треба да го исполнат минималниот праг од десет милиони евра, со минимално учество на сопствени средства од 15 отсто од вкупната вредност на инвестицискиот проект.
Европската комисија ќе ги разгледа предлозите и ќе се обиде да ги поддржи најпогодните проекти со достапни политики, технички или финансиски инструменти, се вели во соопштението.
„Ние не зборуваме само за инвестиции, туку за трансформација. Бараме иновативни, револуционерни проекти кои ќе го придвижат Западен Балкан напред и ќе ги зајакнат неговите врски со ЕУ. Ги поканувам приватните компании да ја искористат оваа можност и да ни се придружат на ова патување – да инвестираат, да иновираат и да ја обликуваат иднината на регионот“, рече комесарката за проширување Марта Кос.
Рокот за аплицирање на инвестициски проекти е 21 мај годинава.
