Намалувањето на средствата за итна помош во храна може да резултира со „смртна казна“ за милиони луѓе, предупреди Светската програма за храна на Обединетите нации (WFP).
Организацијата соопшти дека е длабоко загрижена поради неодамнешните известувања од САД кои укажуваат дека ја прекинале итната помош за храна во 14 земји.
– Ако се имплементира, ова може да биде смртна казна за милиони луѓе кои се соочуваат со екстремен глад, напиша организацијата на X.
WFP е во контакт со американската администрација за да „бара појаснување и да побара континуирана поддршка за овие програми за спасување животи“, се додава.
Извршната директорка Синди Мекејн ги повика светските лидери „да ги измерат последиците“ од намалувањето на помошта.
– Постојаните намалувања на операциите за итни случаи на WFP ќе го продлабочат гладот, ќе ја поттикнат нестабилноста и ќе го направат светот помалку безбеден, напиша таа на X.
– Со конфликтите и екстремниот глад што расте, повлекувањето на поддршката не чини само животи, туку ја поткопува глобалната стабилност, додаде таа.
САД беа најголемиот донатор на WFP во 2024 година, со 4,5 милијарди долари.
Меѓутоа, за време на претседателот Доналд Трамп, САД ги намалија трошоците за меѓународна хуманитарна помош. Владата почна со расформирање на агенцијата за развој УСАИД на почетокот на февруари и затвори бројни програми.
