Лидерот на израелската опозиција, Јаир Лапид, предложи план според кој Египет би ја презел административната контрола над Појасот Газа за период до 15 години.
Според предлогот, Египет би управувал со Газа во текот на осум години, со можност за продолжување до 15 години, додека меѓународната заедница би го отпишала египетскиот надворешен долг кој изнесува повеќе од 150 милијарди долари, пренесе Анадолија.
Лапид го претстави својот план за време на говор во Вашингтон, а потоа го објави на социјалните мрежи, нагласувајќи дека решение за Газа е неопходно во контекст на безбедносните предизвици со кои Израел се соочува на својата јужна граница. Тој ја обвини владата на израелскиот премиер, Бенјамин Нетанјаху, дека не успеала да ја реши ситуацијата во Газа.
– Израел не може да дозволи Хамас да остане на власт. Палестинската власт не е способна да управува со Газа, а состојбата на хаос претставува сериозна закана за безбедноста на Израел, рече Лапид, посочувајќи на потребата за ново решение.
Претходно, Египет управуваше со Газа скоро две децении по основањето на Израел во 1948 година.
Иако Хамас одбива какво било разоружување или отстранување од Газа, Лапид смета дека ова е единственото решение за стабилизација на регионот и намалување на заканата за безбедноста на Израел.
