Со транспаренти, шарени балони и силна порака за правда, во Неготино денес започна протестниот марш „Стоп за сообраќајното насилство“. Илјадници граѓани се собраа за да испратат јасен повик – законите мора да важат за сите, а сообраќајното насилство мора да запре.
Маршот го предводат другарките на 22-годишната Фросина Кулакова, која трагично го загуби животот на 29 јануари, откако беше прегазена на пешачки премин на булеварот „Партизански Одреди“. Трагедијата ја предизвикал 20-годишниот Васил Јованов, кој во моментот на несреќата управувал автомобил без возачка дозвола, под дејство на алкохол и минувајќи на црвено светло.
На протестот присуствуваат родителите на Фросина, нејзини блиски, пријатели и граѓани кои бараат правда, како и роднини на други жртви во сообраќајни несреќи. Тие, со години чекајќи судска разрешница, бараат од институциите брзо и ефикасно процесирање на случаите и строги казни за виновниците.
Протестниот марш во Неготино не е само израз на болка, туку и повик за системски промени во однос на безбедноста во сообраќајот. Граѓаните јасно порачаа дека толеранцијата за неодговорно возење мора да престане, а институциите да обезбедат правда за жртвите и нивните семејства.
