Министерот за внатрешни работи Панче Тошковски оствари работна средба со новоименуваниот амбасадор на Република Италија, Н.Е. Паоло Палминтиери.
На средбата беше потврдена добрата континуирана соработка помеѓу двете министерства за внатрешни работи која се одвива во духот традиционално добрите пријателски односи меѓу двете земји.
Во разговорот двете страни се осврнаа на моменталните проекти на соработка преку ИПА програмата во насока на зајакнување на институционалните капацитети во справувањето со криминал против културно наследство и еколошки криминал и ЕУ поддршка за зајакнување на борбата против криумчарење мигранти и трговија со луѓе.
На крај беше изразена взаемна подготвеност за интензивирање на соработката како на стратешко така и на оперативно ниво како партнери посветени на регионалната и глобалната безбедност како и континуирано зајакнување на капацитетите на македонската полиција преку надградување на Центарот за обука во рамки на МВР кој беше посочен како еден од приоритетите во идната заедничка соработка.
