Владата на Јужна Кореја денеска соопшти дека наредила безбедносна проверка на сите авиони „боинг 737-800“ со кои управуваат домашни авиокомпании по несреќата што се случи во неделата со тој модел на јужнокорејската авиокомпанија „Џеџу ер“, во која загинаа 179 луѓе.
Официјален претставник на јужнокорејското Министерство за транспорт рече дека оваа институција конкретно планира да спроведе ригорозни мерки за безбедносна инспекција во „Џеџу ер“ по повторените проблеми со опремата за слетување.
Официјалниот претставник рече дека Националниот одбор за безбедност на транспортот на САД, претставници на „Боинг“ и производителот на мотори „ЦФМ интернешнл“ ќе учествуваат во истрагата за несреќата во недела.
