Водата од системот на Град Скопје е санитарно исправна и граѓаните може непречено да ја користат, покажал вчерашниот вонреден мониторинг што го извршил Секторот за санитарна контрола на ЈП „Водовод и канализација – Скопје“ по прекинот на водоснабдувањето во саботата.
Како што информира Центарот за управување со кризи (ЦУК), мониторингот опфатил девет клучни места: Автокоманда, Сингелиќ, Маџари, Ново Лисиче, Центар, Драчево, Пржино, Ѓорче Петров и Карпош, од каде биле земени примероци од водата за пиење кои потоа биле физичко-хемиско и микробиолошко лабораториски тестирани. Покрај теренските мерења на рутинските параметри, тестирање било изведено со стандардни методи и јонска хроматографија за физичко-хемиската анализа, како и со полимера за верижна реакција метода за микробиолошката анализа.
Според добиените резултати, сите примероци физичко-хемиски и микробиолошки се во согласност со Правилникот за барање за безбедност и квалитет на водата за пиење, со што е констатирано дека водата од водоснабдителниот систем на Град Скопје е санитарно исправна и граѓаните може непречено да ја користат, наведува ЦУК.
Водоснабдителниот систем на Скопје беше во прекин во саботата, 21.12.2024 година, поради санација, реконструкција и модернизација на градската водоводна мрежа.
