Турскиот претседател Реџеп Таип Ердоган, иако во последните две години го посети Балканот двапати – во септември 2022 и во октомври 2024 година – ја заобиколи Македонија, каде не е дојден уште од септември 2011 година. Денес, кога Република Турција слави 101 година од своето основање, македонската политичка елита беше присутна на приемот организиран во резиденцијата на амбасадорот на Република Турција во Скопје. И покрај важноста на овој дипломатски настан, останува прашањето: зошто Ердоган ја избегнува Македонија?
Присуството на целосниот врв на македонската политика на вечерниот прием покажува дека односите меѓу двете земји се формално добри, но отсуството на Ердоган во последните години отвора простор за шпекулации. Некои аналитичари укажуваат на можни дипломатски или политички тензии, додека други веруваат дека Турција се фокусира на земји со поголем стратешки или економски интерес.
Последната посета на Ердоган во Македонија беше за време на владеењето на Никола Груевски, кога односите меѓу двете земји беа значително поинтензивни. Во меѓувреме, Ердоган го посети речиси целиот регион, вклучувајќи ги Србија, Босна и Херцеговина, Косово и Албанија, но Македонија остана надвор од неговата агенда. Тоа отвора прашање за иднината на односите меѓу двете земји и можноста за повторна официјална посета на турскиот претседател во Скопје.
