Во Охрид од денеска до 26 септември ќе се одржува 31. Балканска олимпијада по информатика (БОИ) што ја организира Здружението на информатичари на Македонија (ЗИМ).
Балканската олимпијада е натпревар во програмирање за средношколци од регионот на југоисточна Европа.
Годинава, на БОИ 2024 ќе има учесници од 15 земји – Северна Македонија, Србија, Албанија, Грција, Бугарија, Словенија, Молдавија, Романија, Босна и Херцеговина, Кипар, Турција, Црна Гора, Италија, Украина и Саудиска Арабија.
Според проф.
д-р Миле Јованов, претседател на ЗИМ, БОИ 2024 е натпревар меѓу новите генерации информатичари, но истовремено и платформа во чии рамки младите умови се здружуваат, се запознаваат со различни култури, се дружат, се вмрежуваат и разменуваат искуства од сферата на информатиката и иновациите.
Поддржувач и пријател на БОИ е „Сорсикс“ (Sorsix), една од водечките ИТ компании во земјава, која додели ваучери за платена пракса за осуммината македонски учесници.
