Летен фестивал Skopje Creative Fest ќе се одржи денеска во Градскиот парк.
Овој настан, којшто има за цел да ја прикаже безграничната креативност на младите поединци во различни уметнички дисциплини, вклучувајќи пеење, танцување, стенд-ап комедија, цртање, поезија и правење филмови, е во организација на KL YES Alumnae Николија Златевска, Исидора Стефановска, Тара Џеладин и Емилија Крстевска.
Надоврзувајќи се на успехот на минатогодишниот мини-фестивал, Skopje Creative Fest ја продолжува својата мисија да обезбеди платформа за сите млади да ги пренесат своите вештини.
Фестивалот е дизајниран да создаде средина каде што креативноста нема граници, поттикнувајќи можности за поврзување на младите уметници, каде тие ќе можат да се сретнат и да соработуваат со истомисленици и потенцијални идни партнери, соопштуваат организаторите.
-Силата на фестивалот лежи во неговите стратешки партнерства и соработки со низа организации, меѓу кои Еквалис, МајндЛипс, Волонтерскиот центар Скопје, Младинскиот образовен форум (МОФ), Мрежата Стела, Младинскиот совет на Амбасадата на САД, Училиште за слепи – Димитар Влахов, многу универзитети, како и Американското катче Скопје.
Овие партнерства го збогатуваат фестивалот, обезбедувајќи признание и поддршка за уметниците кои ќе учествуваат, стои во соопштението. Волонтерството е основна вредност на Skopje Creative Fest.
Фестивалот е создаден на волонтерска основа, охрабрувајќи ги заинтересираните млади да учествуваат во организирањето на настанот.
Оваа вклученост обезбедува драгоцено искуство и можност за поврзување со други кои споделуваат слични интереси, дури и ако тие самите не ја прикажуваат уметноста, додаваат организаторите на фестивалот.
