Иако свеченото отворање е в петок, натпреварите на Олимписките игри почнуваат в среда. Традиционално, програмата ја отвораат екипните спортови – фудбалот и рагбито.
На Игрите рагби се игра во варијанта со седум играчи.
Во Париз ќе настапат вкупно 288 рагбисти, а титулите ги бранат Фиџи во машка и Нов Зеланд во женска конкуренција.
Рагби 7 во машка конкуренција ветува интензивни битки од самиот почеток, а на првиот ден од турнирот на терен ќе излезат освојувачите на медали од Токио.
Одбраната на титулата и нападот на третото злато по ред Фиџи ќе ја почне против Уругвајците.
Сребрените од Токио, Новозеланѓаните, првиот ден играат против Јапонија, а бронзените од претходните ОИ, Аргентинците, се среќаваат со Самоа.
На фудбалскиот турнир програмата од 15 часот ќе ја отворат Аргентина и Мароко, односно Узбекистан и Шпанија, а од 21 часот домаќинот Франција ќе игра против САД.
