Командирот на Територијалната Противпожарна единица (ТППЕ)-Штип, Благој Ренџов при вчерашното гаснење на пожарот на старата депонија меѓу штипските населби Пребег и Мерите е повреден, односно при интервенцијата се здобил со скршеници на двете раце.
Во штипската Клиничка болница е примен синоќа околу 20 часот и 30 минути, каде му е извршена интервенција и е задржан на болничко лекување. Пожарникарите велат во изминатите две недели заедно со нив ги гаснеше пожарите на планината Серта и во штипскиот и неготинскиот дел, не штедејќи се за да се стават пожарите под контрола на неколку локации.
Инаку на планината Серта кракот меѓу селата Селце и Пухче е делумно ставен под контрола, додека се уште е активен во пределот на Пенуш и се движи кон реката Брегалница.
Пожари се гаснат во општините Долнени, Македонски Брод, Старо Нагоричанe и во Ново Село на границата со Бугарија. Овој пожар кај Ново Село веќе со денови се гасне, но повторно се пали и покрај сите обиди за гаснење и од воздух и од земја. Ниту едно населено место не е загрозено. Во моментов активни се 20 пожари, а се гаснат и од земја и од воздух.
