Американскиот претседател Џо Бајден на 8 јуни ќе го посети Париз, каде ќе се сретне со неговиот француски колега Емануел Макрон, соопштија денеска од Елисејската палата.
Тоа ќе биде прва државна посета на Бајден на Франција, а во Париз ќе пристигне со неговата сопруга Џил. Средбата ќе следи по присуството на Бајден на 80-годишнината од слетувањето на Денот Д во Нормандија на 6 јуни.
Двајцата претседатели ќе разговараат за континуираната поддршка за Украина, како и за начините за зајакнување на билатералната соработка во економските, вселенските и нуклеарните прашања, се додава во соопштението на француското претседателство.
