Вработените во прилепскиот Казнено-поправен дом денеска излегоа на двочасовен протест пред затворот и бараат да не се носат осуденици од висок ризик затоа што ниту бројноста на вработените, ниту опременоста, а и местоположбата на институцијата не се соодветни.
Тие посочија дека е алармантна ситуацијата во прилепскиот затвор каде е загрозена безбедноста на вработените поради десеттината префрлени затвореници од висок ризик од затворот Идризово, а во исто време постои недостиг на затворска полиција, крајно тешките услови за работа, но и влошената безбедносна состојба.
Во Прилепскиот затвор моментално има 54 вработени затворски полицајци, а според стандардите, треба да се двојно повеќе, но дел од вработените кои од страв и неможност да одговорат на потребата за обезбедување се веќе на боледување и избегнуваат извршување на работните задачи, додека останатата половина од вработените се оставени на милост и немилост.
Затворските полицајци, членови на Независниот синдикат на полицијата веќе реагирале до Управата за извршување на санкции и разговарале со директорот на затворот, но, како што велат, тој се оградил како ненадлежен за решавање на проблемот.
Го известиле и министерот за правда за ситуацијата, но досега не добиле никаков одговор. Велат дека не отстапуваат од своите барања и затоа ќе продолжат да протестираат секој ден од 12 до 14 часот.
