Европската комисија денеска објави дека му дала на ТикТок 24 часа да ја претстави проценката на ризикот за својата нова апликација ТикТок Лајт.
„ТикТок мора да обезбеди проценка на ризикот за ТикТок Лајт во рок од 24 часа и да обезбеди други барани информации до 26 април 2024 година, по што Комисијата ќе го анализира одговорот на ТикТок и потоа ќе ги процени понатамошните чекори“, се вели во соопштението на ЕК.
Комисијата е најзаинтересирана за ефектите на новата апликација врз менталното здравје на корисниците, бидејќи може да создаде зависност, пренесува Ројтерс.
Европските власти, исто така, сакаат да знаат што прави ТикТок за да ги заштити малолетниците од потенцијално штетната содржина на апликацијата ТикТок Лајт.
Апликацијата ТикТок Лајт, која е наменета за корисници постари од 18 години, започна во Франција и Шпанија овој месец.
