„Скај Спорт Италија“ јавува дека двајца навивачи на англискиот фудбалски премиерлигаш Брајтон во пресрет на натпреварот од осминафиналето во Лига Европа со Рома, синоќа биле избодени со ножеви на улиците во Рим, а потоа и ограбени. „Двајца фудбалски навивачи беа нападнати на улица од шест-седум маскирани лица“, изјави портпаролот на полицијата. Двајцата мажи се на возраст од 28 и 29 години, кои успеале да се засолнат во ресторанот што се наоѓал во близина, од каде што еден од вработените повикал брза помош. На нападнатите навивачи им биле украдени торбите во кои имале пари и лични документи, истрагата на полицијата е во тек. Навивачите биле пренесени во болница, не се во животна опсаност.
Навивачи на Брајтон пред мечот со Рома избодени и ограбени во Рим
