Центарот за управување со кризи (ЦУК) информира дека имало вкупно 10 пожари на отворено во државата во последното деноноќие. Се уште активен е пожарот во општина Македонски Брод.
Пожарникарите од ТППЕ Македонски Брод вчера во 18:10 часот имале пријавен пожар на отворен простор, високо во планина на месноста „Брајча“ меѓу селата Крушје и Томино Село, каде, како што се наведува, се претпоставува дека гори папрат и ниска вегетација.
– Во текот на утрово и денешниот ден е планирано да се направи попрецизна проценка на ситуацијата за евентуално дејство, соопшти ЦУК.
По еден изгаснат пожар имало на територија РЦУК Штип, РЦУК Скопје и РЦУК Куманово, по два пожара на територија на РЦУК Охрид и РЦУК Тетово и РЦУК Битола за три изгаснати пожари на отворено.
Во последното деноноќие имало вкупно 1.825 повици на Единствениот повикувачки број за итни случаи 112. Од нив „реални“ повици биле 43,35 отсто, а 56,65 отсто за други потреби на граѓаните што не биле итни. Кон Полиција биле упатени 58,06 отсто, кон Итната медицинска помош 38,71 отсто, а кон пожарникарите 1,43 отсто од реалните повици кон 112 во ЦУК.
