Во малиот град Мараватио во централно Мексико, двајца кандидати за функцијата градоначалник беа убиени во еден ден, јави ДПА.
Мексиканската конзервативна опозициска Национална акциона партија (ПАН) вчера побара од властите да спроведат темелна истрага за убиствата и да ги изведат сторителите пред лицето на правдата.
Армандо Перез од ПАН и кандидатот на левичарската партија Морена, Мигел Анхел Завала, беа застрелани во своите автомобили во понеделникот, според Канцеларијата на јавниот обвинител во западната држава Мичоакан. Позадината првично беше нејасна.
Според извештаите на медиумите, околу десетина кандидати и политичари веќе се убиени во оваа латиноамериканска земја пред официјалниот почеток на кампањата за националните и регионалните избори на 2 јуни.
Повеќето од жртвите на нападите се локални политичари.
Левичарскиот популистички претседател Андрес Мануел Лопез Обрадор нема да смее повторно да се кандидира на изборите на 2 јуни. Уставот им дозволува на претседателите да служат само еден шестгодишен мандат.
И владејачката коалиција и опозицијата номинираа жени како кандидати за изборите во 2024 година.
Кандидатот на партијата на Лопез Обрадор, Морена, градоначалничката на Мексико Сити, Клаудија Шеинбаум, очигледно води во анкетите. Поранешниот сенатор Ксочитл Галвез се кандидира за опозицијата, забележува ДПА.
