Пристапувањето на Албанија во ЕУ е блокирано поради несогласувањата меѓу Северна Македонија и Бугарија. Да го искористиш местото во ЕУ како лост против соседите е најантиевропската работа што може да се замисли. Ова го изјави албанскиот премиер Еди Рама на панел дискусијата „Балканот во фокус“ во рамките на 60. Минхенска безбедносна конференција. На дискусијата учествуваа и македонскиот претседател Стево Пендаровски, црногорскиот претседател Јаков Милатовиќ и американскиот сенатор Џејн Шахин. Според Рама, Бугарија ја блокира европската интеграција на Скопје и Тирана и затоа двете земји треба да преговараат со ЕУ одделно, а не како пакет. „Се надевам дека веќе сме одвоени од Северна Македонија, бидејќи последниот пат кога бевме двојка, не ни дозволија да го направиме следниот чекор. Тоа се случи поради ситуација која не е поврзана со Албанија, туку со Бугарија. Откако ги одржавме меѓувладините конференции и го завршивме скрининг процесот со ЕУ, мислам дека веќе не сме двојка“, рече Еди Рама. Тој ги спореди евроинтеграциите на двете земји со претекувањето кога се вари турско кафе. -Ситуацијата во Северна Македонија е првенствено резултат на политиката на Европската унија, која не може да стави крај на практиката на киднапирање земји. ЕУ им дозволува на своите членки да го користат своето место во блокот како лост против своите соседи. Тоа е најантиевропското нешто што човек може да си го замисли, рече албанскиот премиер. Според него, последиците ги сносат самите земји, „бидејќи тоа е најдоброто гориво за национализмот“. „За жал, живееме во свет во кој национализмот и глупоста успеваат“, додаде Еди Рама. На прашањето дали неговата земја ќе има проблеми со Грција на патот кон ЕУ, Рама саркастично одговори: „Проблеми? Не, ние ја сакаме Грција. Не дојдов во Минхен да ги вознемирувам моите грчки пријатели. Тие сакаат да ме видат, да слушнат мојот глас, кога ќе кажам нешто, но не можете да нè скарате“. Во август минатата година, Еди Рама шокираше со својот говор за Бугарија на Стратешкиот форум во Блед, Словенија. Потоа ја спореди бугарската политика кон Северна Македонија со руската агресија врз Украина.
Рама: Бугарија ги киднапира Македонија и Албанија
