Идејата дека Русија ќе се повлече од Донбас и Крим е „апсолутно нереална“, изјави за порталот „Хлавнесправи.ск“ премиерот на Словачка, Роберт Фицо.
„Ако некој мисли дека единственото решение за конфликтот во Украина е Русите да се вратат на границата каде што беа (пред ескалацијата на конфликтот во февруари 2022 година) и да се повлечат од Крим – тоа е апсолутно нереално. Мора да се прилагодиме на новата реалност која ја имаме сега. Наивно е да се верува дека Русите ќе ги напуштат Донбас и Луганск, наивно е да се мисли дека Русите ќе го напуштат Крим“, рече словачкиот премиер.
Според него, нема воено решение за конфликтот во Украина.
„Навистина би сакал оваа војна да заврши. Во спротивно ќе бидеме сведоци на голем број жртви од двете страни. Не можам да замислам како ќе изгледа мирот меѓу Русија и Украина, но тоа ќе се случи“, смета Фицо.
И на Украина и на Русија им се потребни безбедносни гаранции за да се стави крај на конфликтот што е можно поскоро, истакна Фицо.
„Зборувајќи за некакво претстојно регулирање на руско-украинските односи, може да се каже дека тоа ќе биде болен процес за двете страни. Треба да им се дадат одредени безбедносни гаранции. Некој треба да ѝ даде гаранции на Украина, а некој на Русија“, наведе тој.
Како што додаде, Западот ја измамил Русија, уверувајќи ја дека НАТО нема да се прошири. Затоа, Русија се бори за безбедносни гаранции за себе „затоа што чувствува дека сега ги нема“.
Фицо го повтори своето противење Украина да влезе во НАТО.
„За конфликтот да заврши, Русија и Украина мора да бидат задоволни. Украина треба да чувствува дека нејзината безбедност е обезбедена. Русија треба да добие гаранции дека НАТО нема дополнително да се прошири на сметка на Украина“, заклучи словачкиот премиер.
