Генералниот секретар на Обединетите нации Антонио Гутереш денеска објави дека формирал независен комитет задолжен да ја процени „неутралноста“ на Агенцијата на ОН за палестински бегалци (УНРВА) и да одговори на наводите дека некои нејзини вработени учествувале во нападите на Хамас врз Израел на 7 октомври.
Групата ќе ја предводи поранешната француска министерка за надворешни работи Кетрин Колона во соработка со три истражувачки центри – Институтот Раул Валенберг во Шведска, Институтот Кристијан Микелсен (ЦМИ) во Норвешка и данскиот институт за човекови права, се вели во соопштението. .
Израел ја обвини Агенцијата, која е „рбетот“ на хуманитарната помош во Појасот Газа, дека била „целосно инфилтрирана од Хамас“ и дека 12 од нејзините 13.000 вработени биле вклучени во нападите на 7 октомври врз јужен Израел, предводени од милитантната исламистичка организација, што ја започна сегашната војна.
По тие обвинувања, Агенцијата на ОН ги отфрли повеќето обвинети за вмешаност и вети темелна истрага и правни постапки доколку е потребно.
Како одговор на обвинувањата на Израел, десетици земји, вклучително и големите донатори, САД, Германија, Велика Британија и Шведска, објавија дека го суспендираат финансирањето на Агенцијата, која минатата недела објави дека поради тоа ќе биде принудена да престане со работа до крајот на февруари.
Целта на групата за оценување, назначена денеска, е да утврди дали Агенцијата прави се што е во нејзина моќ за да обезбеди неутралност и да одговори на сериозните обвинувања. Групата треба да поднесе прелиминарен извештај до генералниот секретар на ОН Антонио Гутереш до крајот на март, а потоа конечен извештај до крајот на април, кој, доколку е потребно, треба да содржи препораки за подобрување и зајакнување на постоечките механизми.
Генералниот секретар посочи дека „тие обвинувања се упатени во време кога УНРВА, најважната организација на ОН во регионот, работи во многу тешки услови за да обезбеди помош за два милиони жители на Појасот Газа кои зависат од него за да преживеат во среде една од најтешките хуманитарни кризи во светот“.
Независната проценка ќе се спроведува паралелно со внатрешната истрага што ОН ја започна во јануари по обвинувањата против 12 вработени во Агенцијата на ОН за палестински бегалци на Блискиот Исток.
Шпанија денеска најави дека ќе обезбеди итна помош од 3,5 милиони евра на Агенцијата чија работа е загрозена со прекин на финансирањето.
