Земјотрес со јачина од 5,2 степени според Рихтеровата скала денеска ја погоди Малатија на истокот на Турција, а беше почувствуван и во соседните региони.
Според информациите на веб-страницата на Агенцијата за управување со катастрофи и вонредни ситуации (АФАД), земјотресот се случил на длабочина од 14 километри.
Министерот за внатрешни работи Али Јерликаја изјави дека се ангажирани сите екипи на АФАД и другите институции.
„Сите тимови на АФАД и надлежните институции почнаа да работат на скенирање на теренот по земјотресот со јачина од 5,2 степени во областа Баталгази, кој беше почувствуван и во околните провинции“, напиша тој на платформата Икс (Твитер).
Тој изјави дека засега нема пријавени жртви или материјална штета, како и дека надлежните служби „внимателно ја следат состојбата“. Според турските медиуми, земјотресот бил почувствуван и во Газиантеп, Кахраманмараш, Шанлиурфа и Адијаман.
