Портпаролката на СДСМ Богданка Кузеска, очекува потег од Христијан Мицкоски откако министрите од ДУИ поднесоа оставки, кои ќе се ефектуираат ако пратениците на ВМРО-ДПМНЕ гласаат за уставните измени.
Кузеска вели дека сите услови кои ги поставил Мицкоски за ДПМНЕ да поддржи уставни измени се исполнети, вклучително и Влада без ДУИ.
„Ставајќи го државниот пред партискиот интерес СДСМ и ДУИ покажуваат одговорност кон врвната стратешка цел, а тоа е европската иднина на земјата и сите наши граѓани“, изјави Кузеска.
Таа вели дека уставните измени се влезени во собраниска процедура, јавно се објавени и откако нивната содржина е јавно достапна, никој, па вклучително и Мицкоски нема ништо против таквите измени.
„Сега, на потег е Христијан Мицкоски да докаже дали има државнички капацитет, дали му е важна европската иднина на земјата или се грижи само за својата фотелја во Белиот дворец“, рече портпаролката.
СДСМ не отстапува од одлуката за уставните измени, со став дека членството во ЕУ е врвна стратешка цел на мнозинството граѓани и за иднината на државата.
„Еве уште една шанса за Мицкоски и ДПМНЕ кои со глас за Европа во македонското Собрание можат да покажат дека навистина се за европската агенда, дека европската агенда е и македонска, наместо само да кочат и блокираат“, додаде Кузеска.
Таа побара од Мицковски да одлучи дали ќе гласа за ЕУ или за изолација на државата.
