Пожарите во Грција денеска се под контрола, но пожарникарите продолжуваат со борбата против огнената стихија бидејќи во текот на денот се очекуваат силни ветрови.
По две недели борба со стотици пожари што избувнаа низ оваа медитеранска земја, повеќе од 460 пожарникари се мобилизирани во последните неколку дена на најопасните жаришта: островите Родос и Крф и во централна Грција, во близина на Волос, во провинција Магнезија.
„Веќе нема активни пожари на Родос, Крф и во Магнезија, областите на најголема загриженост“, велат грчките пожарникари во интервју за агенцијата Франс прес.
Температурите повторно се зголемуваат, а се предвидува и силен ветер
Грчката метеоролошка служба EMY предвидува брзина на ветерот меѓу 50 и 60 километри на час, а по два постудени дена температурите полека повторно ќе се зголемуваат, со очекувани максимални меѓу 35 и 37 степени.
Поради тоа, топлината и ветерот би можеле да ја влошат моменталната поволна ситуација. Грција, како и другите медитерански земји, беше зафатена од период на екстремно топло време – на некои места беа забележани и до 46 степени.
За две недели во Грција изгореа над 50.000 хектари, а пет лица загинаа.
Евакуација на 20.000 луѓе од Родос
Катастрофите доведоа до неколку евакуации, од кои последната беше минатиот викенд на Родос кога беа евакуирани 20.000 луѓе. Пожарите извршија притисок и врз конзервативната влада на неодамна реизбраниот Киријакос Мицотакис, кој беше на удар на критики затоа што не направи доволно за да се заштити земјата од пожари.
Грчкиот министер за цивилна заштита во петокот поднесе оставка откако го криеше фактот дека изминатите денови бил на одмор, за време на најжестоката борба со пожарот.
