Безбедноста на граѓаните на Македонија е одамна загрозена и тоа се докажува преку безброј сомнителни случаи за кои нема разрешница. Скандал од вакви размери, каде што се загрозени личните податоци на граѓаните, треба да биде аларм за институциите, изјави Марија Митева, портпарол на ВМРО-ДПМНЕ, одговарајќи на новинарско прашање за сомнежите за злоупотреба на податоците од Управата за водење на матичните книги.
Митева истакна дека треба темелно да се истражи која е фирмата што вршела дигитализација и дали се точни наводите дека сопственикот е близок роднина на функционер од власта.
„За какви потреби се злоупотребени овие податоци и кој ќе гарантира заштита на граѓаните? Овој случај на евентуална злоупотреба на податоци уште еднаш потврдува дека власта е длабоко навлезена во криминал и корупција и што побргу се потребни избори и промена на власта, која најпрвин ќе резултира со одговорност за сторителите, а потоа со институции што ќе функционираат чесно и во интерес на граѓаните“, изјави Митева.
