Владата на СДС и ДУИ во случајот „Иловица“ наместо за народот, работи за Дестани кој важи за близок до ДУИ. Компанијата на семејството Дестани добила дозвола од владата да преземе удели во „Еуромакс Ресурсис“, која ја има концесијата за „Иловица“, иако нема никакво искуство од ископот и рафинирањето на злато, вели портпаролката на ВМРО-ДПМНЕ, Марија Митева.
„Владата на СДС и ДУИ дозволила компанија на Дестани да влезе во рудник за кој самите тврдеа дека нема да се отвори. Владата согласно закон дала согласност, без која Дестани не можел да се стекне со удел во компанијата и да стане концесионер на Иловица. Дестани купил удел во фирмата, а купувањето го дозволила самата влада на СДС и ДУИ. И тоа во време кога владата ја има раскинато концесијата, и има спор пред Управен суд. Зошто ако владата бил сигурна дека рудник нема да има и ја раскинала концесијата, воопшто дала дозвола Дестани да влезе? И зошто Дестани ако не бил сигурен дека концесијата ќе биде вратена воопшто купил удели во Еуромакс Ресурсис? Како магично само 15 дена откако Дестани влегува во сопственичката структура во Иловица, Управен суд носи одлука, за укинување на Одлуката на владата за раскинување на Концесијата?“, прашува Митева.
Бара одговор и на други прашања.
„Зошто владата дозволила Дестани да влезе во Иловица, ако и самите тврдеа дека рудник нема да има? И второ, дали власта свесно дозволила Дестани да стане концесионер, за парите од отштетата при евентуална арбитража која би требало да ја добие носителот на концесијата да отидат кај Дестани па потоа да се префрлат во СДС и ДУИ?
Не се јасни намерите на власта, дали сакаат да се отвори рудникот и притоа да не знаеме какви стандарди ќе се користат и дали почвата во струмичко ќе се контаминира или сакаат да ги земат парите од арбитражната одлука и да наплатат стотици милиони без било што да сработат?“
И во едниот и во другиот случај СДС и ДУИ добиваат, а граѓаните губат, истакнува Митева и додава дека во целата постапка ДУИ е реализатор, а СДС главен помагач.
