Џо Бајден денеска во Белата куќа му посака добредојде на израелскиот колега Исак Херцог, пофалувајќи ги „нераскинливите“ врски со Израел и покрај тензиите со владата на Бенјамин Нетанјаху поради неговата контроверзна судска реформа.
Израелскиот претседател, чија должност е претежно протоколарна, беше примен во Овалната соба, каде што истакна дека дошол да изрази „признание и благодарност од сите страни на политичката сцена“, а американскиот претседател некои членови на израелската влада ги нарече „екстремисти“.
Истовремено, тој ја спомена „жестоката дебата“ што се води во неговата земја, осврнувајќи се на контроверзната судска реформа, велејќи пред новинарите: „Да повторам јасно, навистина јасно, дека израелската демократија е здрава, силна и отпорна“.
Херцог, кој веќе беше примен од американскиот претседател во октомври 2022 година, е во дводневна посета на Вашингтон и во среда треба да се обрати пред двата дома на Конгресот.
Односите меѓу САД и Израел се влошија по враќањето на Бенјамин Нетанјаху на власт во декември, благодарение на коалицијата со ултраортодоксни и екстремно десничарски партии.
Како знак на добра волја за намалување на тензиите, американскиот претседател во понеделникот се согласи да го прими израелскиот премиер во САД до крајот на годината, но Белата куќа не откри кога и каде ќе биде.
Портпаролот на Белата куќа Џон Кирби изјави дека одлуката на Бајден да биде домаќин на Нетанјаху не значи дека „не сме загрижени за реформите во судството и екстремистичкото однесување на некои членови на владата на Нетанјаху“.
„Таа загриженост останува силна. Не вознемирува тоа“, рече тој.
