Германскиот канцелар, Олаф Шолц, изјави дека нема врска меѓу преговорите за членство на Турција во ЕУ и влезот на Шведска во НАТО како што тврди турскиот претседател Реџеп Таип Ердоган.
„Тоа не треба да се гледа како поврзана тема“, рече германскиот канцелар на прес-конференција во Берлин коментирајќи го неочекуваниот услов што го постави турскиот претседател во изјавата за новинарите претходно.
Шолц оцени дека „ништо не стои на патот на Шведска да влезе во НАТО“, што турскиот претседател го кочи со месеци.
„Првин отворете го патот за Турција да влезе во Европската Унија, а потоа ние ќе го отвориме патот за Шведска исто како што го отворивме патот за Финска“, изјави Ердоган пред новинарите пред отворањето на годишниот самит на НАТО во Вилнус.
Олаф Шолц рече дека гледа „позитивна порака“ во изјавите на турскиот претседател, имено дека зеленото светло за членството на Шведска е „замисливо во блиска иднина“.
Преговорите меѓу Турција и ЕУ се во застој веќе неколку години.
