Војводата и војвотката од Сасекс работат на спин-оф серија „Големи очекувања“ (Great Expectations) за „Нетфликс“.
Двојката потпиша договор од 100 милиони долари со стриминг-гигантот кога се откажаа од кралските должности за да се преселат во Калифорнија пред три години.
Иако нивниот договор досега резултираше само во документарна серија „Хари плус Меган“, и уште една документарна серија „Живеј за да водиш“ (Live to Lead), во план се и други потфати.
Live to Lead претстави дел од личностите кои направиле најголеми промени во светот, меѓу кои и Грета Тунберг, Џасинда Ардерн и Глорија Стајнем. Во серијата, војводата и војвотката од Сасекс прават интервјуа со овие личности.
Според „Волстрит журнал“, компанијата „Арчивел“ на принцот Хари и Меган ја создава серијата „Лоши манири“ (Bad Manners), пред-продолжение базирано на класичен лик на Чарлс Дикенс – госпоѓица Хавишем – но осамената стара мома овојпат е замислена како силна жена која живее во патријархално општество. Серијата допрва треба да добие зелено светло.
Документарната серија на Хари за игрите „Инвиктус“ (Invictis Games) е исто така при крај. Aнимираната детска серија на Меган, Pearl, беше откажана минатиот мај, а на парот исто така беа поништени голем број други предлози.
