Шпанија е вториот шампион од Лигата на нации на УЕФА, откако по 0:0 по 120 минути на „Де Кујп“ во Ротердам, голманот Унаи Симон блесна со два одбранети пенали за 5:4 победа на пенали над Хрватска, чија „златна генерација“ останува без трофеј во можеби последната шанса.
Во 120 минути игра, двете репрезентации не успеаја да стигнат до гол, а Хрватска успешно ги одби сите напади на „фуријата“, за на крајот наследникот на Португалија, која ја освои првата титула од најновото европско натпреварување во 2019, се одлучуваше на пенали.
Пенал-серијата ја започнаа Хрватите, со Никола Влашиќ како прв прецизен, а Шпанија одговори преку ветеранот Хоселу. Во втората серија, Марцело Брозовиќ не згреши, а Доминик Ливаковиќ не беше дораснат за ударот на ѕвездата на Сити, Родри. Во третата серија, прецизни беа капитенот на Хрватите, Лука Модриќ и Микел Морино, за обидот на Ловро Мајер да заврши во рацете на Унаи Симон за предност на Шпанците, која ја потврди и Марко Асенсио со прецизен удар.
Ветеранот Иван Перишиќ стрелаше за да ја продолжи надежта на „коцкестите“, за Ајмерик Лапорт да ја продолжи драмата откако ја погоди пречката за 4:4 по пет серии. Унаи Симон повторно беше на висината на задачата бранејќи го обидот на Бруно Петковиќ, за потоа Дани Карвахал да ја освои титулата за „фуријата“.
PETKOVIC MISSES THE PENALTY, ANOTHER SAVE FROM UNAI SIMON! #NationsLeagueFinal
— Reyi (@Reinaldodcg9) June 18, 2023
