Поранешниот бек на Барселона, Бразилецот Дани Алвеш ќе остане во притвор, откако повторно му беше одбиена кауцијата за сексуалниот напад во декември 2022 година.
40-годишниот Алвеш беше уапсен во јануари поради сексуален напад над една жена во ноќен клуб во Барселона на 30 декември, по што му беше раскинат договорот со мексиканскиот клуб Пумас УНАМ. Судот во Барселона повеќе пати ги одби барањата да биде пуштен на слобода со кауција и денеска беше одлучено дека постои сериозна опасност тој да ја напушти Шпанија, и затоа ќе остане во притвор.
Неговите адвокати денеска пред судот објавија видео во кое се гледа жената како флертува со фудбалерот, но судијата одлучи дека тоа не е оправдување за сексуален напад. Алвеш постојано тврди дека немало силување и дека сексуалниот чин бил консензуален.
