Од четврток зеленчукот нема да има замрзната цена. Мерката за замрзнување на цените донесена за да се спречат големи поскапувања истекува утре, а Владата најави дека нема да ја продолжи. Вицепремиерот за економски прашања, Фатмир Битиќи, денес образложи дека цените се одмрзнуваат оти сè што досега ја кревало цената е нормализирано.
„Сите предуслови што треба да се исполнат за да останат цените на исто ниво, па можеби дури и очекувањето да бидат помали, се направени. Сите претходни услови што беа креирани за да се зголемат цените, сега ги нема. Електричната енергија не е на цената на која беше, цената на суровини е намалена на светските берзи. Тоа значи дека и оние што произведуваат, но и оние што тргуваат, имаат услови реално да ги задржат намалените цени, како што беа замрзнатите, дури и да одат надолу. Ние видовме дека на пазарот на трговија со зеленчук цените природно се намалија дури 40 отсто од замрзнатите. Затоа одлуката е да се одмрзнат“, рече вицепремиерот Битиќи.
Минатата недела претставници од Владата имале состанок во Стопанската комора, од каде што добиле убедување дека нема да има големи осцилации во цената. Битиќи вели дека будно ќе ја следат состојбата и доколку има зголемување на цените, веднаш ќе реагираат.
