Претседателот на Наполи, Аурелио Де Лаурентис, потврди дека тренерот Лучано Спалети ќе го напушти клубот. Спалети заминува како шампион на Серија А. Искусниот тренер по 33 години ја врати титулата во градот под Везув.
„Тој е слободен како птица на гранка. Кога некој ќе дојде кај вас и ќе ви каже дека заврши еден циклус во животот, што можете да направите? Дали треба да приговарате на тоа. Ми рече дека сака да одмори една година. Се согласив. Го испорача она што го побарав од него и за тоа сум му благодарен, му посакувам се најдобро. Тој е одлична личност и тренер. Треба да го прави она што го сака. Јас го почитувам неговиот избор и покрај важечкиот договор“.
Де Лаурентис уште еднаш напомена дека следната цел е да го добие под управа стадионот „Диего Армандо Марадона“, во спротивно…
„На моја иницијатива стадионот го доби името по Марадона. Сега сакам да направам нешто за сите играчи на Наполи, да го средиме стадионот. Или градот Неапол ќе ни го даде стадионот да управуваме со него во следните 99 години или ќе одам и ќе изградам нов стадион во Казерта. Сакам мултифункционален стадион кој може да работи седум дена во неделата, да има свој музеј, да има можност да се одржуваат концерти, па дури и луѓето да можат да се венчаат таму ако сакаат“.
