На утрешниот празник на сесловенските просветители светите Кирил и Методиј, во селото Пустец во Албанија каде што живеат Македонци се најавува отворање на бугарски клуб.
Ваквата информација преку социјалните мрежи ја објави претседателот на „Фондација Македонија“ Виктор Стојанов.
„Пристигнавме во нашето село во Албанија. Пустец. Во среда на најголемиот бугарски празник тука ќе има бугарски собир“, пишува Стојанов во својата објава на Фејсбук.
Градоначалникот на Пустец Пали Колефски вели дека општината не добила никакво барање за отворање на бугарскиот културен центар, а дозвола не дале ниту надлежните албански институции.
Според него, се работи за провокација.
Во изминатиот период, Maкедонци во Албанија реагираа дека Софија врши асимилација на Македонците во Пустец.
Лидерот на единствената македонска партија во Албанија, Македонска алијанса за европска интеграција МАЕИ, Васил Стерјовски месецов во Корча пред претставници на набљудувачката мисија на ОБСЕ/ОДИХР зборуваше за разни методи и притисоци што последните години Бугарија како членка на ЕУ ги користи за таа цел.
