Американскиот претседател Џо Бајден денеска изјави дека е уверен оти тој и конгресмените од Републиканската и Демократската партија ќе постигнат договор за буџетот, а американската влада ќе го плати својот долг.
Бајден додаде дека преговарачите ќе се сретнат денеска, и ќе биде во близок контакт со нив, пренесува Ројтерс.
„Ќе се обединиме бидејќи немаме алтернатива. Да бидам јасен, овие преговори се однесуваат на буџетската рамка, а не дали ќе ги платиме долговите или не“, рече американскиот претседател.
Тој посочи дека лидерите на двете партии се согласиле дека нема да дозволат САД да дојде во ситуација да не може да си ги плати долговите.
Американскиот министер за финансии Џенет Јелен претходно предупреди дека американската влада би можела да остане без пари до 1 јуни доколку Конгресот не го подигне или суспендира горната граница на долгот.
Долгот на федералната влада моментално изнесува 31,4 трилиони долари.
Постигнувањето на границата на долгот би значело дека американската влада повеќе не е во состојба да позајмува пари и, во исто време, би ја ставила во ситуација да не може да го отплати долгот, што би ги разнишало глобалните финансиски пазари и би ја поткопало довербата во Америка како глобален деловен партнер, според Ројтерс.
