Регулаторите на ЕУ го одобрија обидот на технолошкиот гигант „Мајкрософт“ да ја купи американската компанија „Активижн близард“, една од најголемите производители на видеоигри, вредна 69 милијарди долари.
Ова доаѓа три недели откако Велика Британија го блокира договорот поради загриженоста дека ќе ѝ наштети на конкуренцијата во сферата на видеоигрите.
„Мајкрософт“ ќе треба да ги убеди регулаторите во светот дека договорот, најголем во историјата на видеоигрите, нема да им наштети на конкурентите.
Предложеното преземање ги подели глобалните регулатори.
За да може договорот да се имплементира, „Мајкрософт“ и „Активижн“ треба да добијат одобрение од регулаторните тела во Обединетото Кралство, Европската Унија и САД.
Американската федерална комисија во декември поднесе тужба за блокирање на договорот – одлуката на судија е малку веројатна пред крајот на годината, според Би-би-си.
