Швајцарија го прошири списокот на санкции кои се однесуваат на Русија и ги стави на него руската приватна платеничка група „Вагнер“ и новинската агенција РИА ФАН, се вели во соопштението на швајцарското Министерство за економски прашања, образование и истражување (ЕАЕР) објавено денеска.
Санкциите ќе стапат на сила денеска во 18 часот, велат од министерството.
Според соопштението, „Вагнер“ е под санкции поради неговото „активно учество во воената агресија на Русија против Украина“, додека РИА ФАН е санкционирана „за ширење на провладината пропаганда и дезинформации“.
На 14 април 2023 година, ЕУ ја санкционираше групата „Вагнер“ поради нејзиното активно учество во воената агресија на Русија против Украина.
Основана и предводена од Евгениј Пригожин, „Вагнер’ е приватна воена организација со седиште во Русија која ѝ служи на Москва како средство за хибридна војна.
Групацијата „Вагнер“, чија правен статус е нејасен, е дел од сложената мрежа на глобални компании, вклучувајќи компании активни во воздухопловството, безбедноста, технологијата, тргувањето со стоки, финансиските услуги и активностите на влијание.
Во исто време, ЕУ ја санкционираше руската новинска агенција РИА ФАН поради нејзиното ширење на провладина пропаганда и дезинформации.
Претходно на 10 април 2023 година, ЕУ издаде забрана за емитување и рекламирање на арапските канали на двата руски радиодифузери РТ и Спутник. Двата канали играат интегрална улога во системската меѓународна кампања на руската влада за медиумска манипулација и фалсификување на фактите, објасни унијата по носењето на мерките.
На 25 март 2022 година, швајцарскиот Федерален совет изјави дека ќе биде поефикасно да им се спротивстави на невистинитите и штетни изјави со факти отколку да ги забрани. Поради таа причина, двата канали санкционирани во ЕУ нема се забранети во Швајцарија, но е забрането емитувањето реклами на овие канали.
