Пропадна обидот за формирање влада на Федерацијата Босна и Херцеговина откако претседателката на ентитетот Лидија Брадара и потпретседателите Рефик Лендо и Игор Стојановиќ не се договорија, пренесува Б92.
Лендо (СДА) не даде потпис за формирање влада, а по средбата изјави дека неговата партија ќе понуди решение во следните седум до десет дена и дека потоа тој лично ќе поттикне нова средба.
„Осумката ќе добие прифатлива понуда од СДА. Ќе понудиме нешто што е во интерес на граѓаните, што би било добро и прифатливо за Осумката,“ рече Лендо, нагласувајќи дека е подобро домашните политичари да се договорат отколку високиот претставник да донесе каква било одлука.
Стојановиќ, од друга страна, вели дека Лендо зборува за решенија кои досега никој не ги видел, дека само купува време и дека и претходно најавувал нови средби кои никогаш не се реализирале.
„Немаме механизми да ја надминеме оваа ситуација. И понатаму е статус кво е сè уште немаме нови информации за формирање влада“, додаде Стојановиќ и нагласи дека Лендо и СДА се фаќаат за сламка за да останат на власт на ниво на федерација, објави „Независне новине“.
Рокот за формирање влада на Федерацијата БиХ истече на 6 април, по што високиот претставник ги повика лидерите на партиите што поскоро да се договорат зашто, во спротивно, ќе биде принуден да ги искористи овластувањата од Бон и да наметне формирање влада.
Претседателката на Федерацијата БиХ, Лидија Брадара, пак, по средбата со Стојановиќ и Ленда изјави дека, што се однесува до неа, владата е именувана и чека потврда.
„Не мислам да ја менувам одлуката донесена во согласност со Уставот и утврдените рокови како и со парламентарно мнозинство. Се друго е купување време и блокирање“, изјави Брадара, а пренесе сараевскиот портал „Кликс“ .
Таа нагласи дека денешната средба не резултирала со промени во ставовите, освен што, како што рече таа „господинот Лендо си даде дополнителни седум дена“.
