Расчистување на местото, набавка на реквизити и нивна монтажа. Вака ќе тече процесот за изградба на лунапаркот, кој е затворен од 2017 година. Градоначалничката на град Скопје, Данела Арсовска, посочи дека е почната постапката за набавка на реквизити. Досега се средувале техничките работи поврзани со обезбедување документација.
„Во овој момент, по добивањето на сите документи, почнува постапката да се обезбедат дополнително реквизити, а на самиот терен ќе се почне со расчистување на теренот и постапување на постаментите и изградбата на инфраструктура, која треба да биде обезбедена пред монтажата на реквизитите“, рече Арсовска.
Според неа, кога дошла на функцијата, во Град Скопје не бил завршен проектот.
„Не може да се инвестира кога за тоа немало завршен проект. Од страна на претходното раководство беше почнато со изработка на проектот, а ништо од она што е почнато нема да го стопираме. Го прифативме проектот, беше во завршна реализација и до Град Скопје беше доставен минатиот месец. Тука исто така имаше процес, кој како таков опфаќаше обезбедување на неопходните дозволи од ресорната Општина Карпош за да има формално-правна можност да се почне со градба. И сега постапките почнуваат. Имаше забелешки за ревизијата за начинот како се воделе постапките во минатото бидејќи таму имало објекти и лица што имале соодветни договори за закуп. Сите недостатоци се надминати и може да се почне со изградбата на лунапаркот“, додаде Арсовска.
