По два пропаднати огласи за приватни превозници во Град Скопје, овојпат, има пријавени. Ова го потврди и скопската градоначалничка Данела Арсовска. Таа не кажа број на пријавени, туку посочи дека ќе чекаат до истек на рокот за да видат колку вкупно апликации ќе има.
„Да, тие се пријавија. Ќе го причекаме и последниот рок кој е позитивна пракса, за да пристигнат ако има по пошта некои дополнителни апликации и согласно истото од наредната недела, комисијата треба да има одлука“, кажа Арсовска.
Посочи дека добредојдени да вршат јавен превоз со приватни автобуси, се сите превозници кои имаат чесни намери и ќе работат во прилог на граѓаните.
„Она кое верувам дека самите успеавте да видите во јавноста, дека ги повикавме сите кои сакаат чесно и одговорно да ја вршат оваа дејност, да се пријават на овој оглас со новото координативно тело на превозниците. Тие имаат чесни намери, навистина се заинтересирани да продолжат да работат, да работат како што се бара, да биде во интерес на граѓаните и да биде овозможена најдобрата можна услуга. Второ разговаравме за адаптирање и прилагодување кон стандардите важни за граѓаните за подобрување на состојбите во животната средина (за обновување на возниот парк)“, додаде Арсовска.
На почетокот на март, приватните превозници кажаа дека се враќаат на работа од идниот месец. Долгот кој ЈСП го има кон нив се става на страна и ќе се решава тековно.
