Економските мерки и политики на Владата предводена од СДСМ и премиерот ДИмитар Ковачевски даваат резултати. И во време на светска економска и енергетска криа, македонската економија е конкурентна и атрактивна за големи странски инвестиции, изјави на денешната прес-конференција, Даниела Николова, пратеничка на СДСМ.
Таа наведе дека се отвора нова фабрика во Технолошката индустриско развојна зона Скопје 2, станува збор за германската компанија „Гересхајмер“, глобален партнер на фармацевтската индустрија. Инвестицијата е во вредност од над 126 милиони евра, што претставува рекорден износ на инвестиција од основањето на технолошко-индустриските развојни зони, како и најголема гринфилд инвестиција од осамостојувањето на државата.
Предвидено е отворање на над 180 нови работни места, со просечна плата далеку над државниот просек,рече Николова.
Како што истакна Николова, благодарение на одговорниот и ефикасен пристап на Владата во привлекување странски инвестиции, годината зад нас е најдобрата година од постоењето на ТИР зоните, во која е остварен највисок извоз досега од 3,7 милијарди евра.
Бројот на вработени во зоните во јануари достигна речиси 16.400 што е за 16 проценти повисок од јануари 2022.
Сето ова е дополнителен мотив за нас, да продолжиме со реализација на потребните реформи, на мерките и политиките што обезбедуваат нови инвестиции, добро платени работни места и економски раст, изјави Николова.
