„Еуроњуз“ претстави преглед на земјите во Европа чии граѓани умеат да зборуваат повеќе од еден јазик.
Генерално, Европејците се доста добри во јазиците: околу 65 отсто од населението на континентот може да зборува барем еден јазик различен од нивниот мајчин јазик. За споредба, само околу 20 проценти од возрасните во САД можат да го направат тоа.
Постојат значителни варијации помеѓу регионите. Нордиските земји се истакнуваат во двојазичноста, додека јужна Европа се бори малку повеќе. Можеби не е изненадувачки, земјите каде англискиот е мајчин јазик не се чини дека се заинтересирани за учење странски јазик, бидејќи само 50 проценти од Ирците зборуваат втор јазик, а најлошата оценка во Европа му се припишува на Обединетото Кралство, и тоа многу малку – само 34 проценти.
Според графиконот објавен на порталот „Еуроњуз“, по Обединетото Кралство со странските јазици најслабо се справува народот во Романија со 35,8 отсто, Босна и Херцеговина со 39 и Албанија со 40 проценти на луѓе кои знаат повеќе од еден јазик.
Шпанија е со 54,3 отсто, Франција со 60,1, а Италија со 66,1 процент.
Македонија предничи во однос на овие држави со 68,3 отсто од населението кое говори повеќе од еден јазик. Во споредба со останатите балкански држави, пред нас се Хрватска со 73,2 отсто, Србија 79,3 отсто и Словенија со 84,1 процент.
На самиот врв на рангирањето се Естонија, Швајцарија, Малта, Норвешка, Финска, Луксембург, Литванија, Данска, Латвија, кои имаат повеќе од 90 отсто од двојазичното население: Победник е Шведска со дури 96,6 отсто од луѓето кои зборуваат два или повеќе јазици.
Течното познавање на неколку јазици е вештина која често се пофалува во професионалниот свет. Тоа е исто така одличен начин да научите за различни култури и да можете да комуницирате со луѓе од целиот свет, пишува „Еуроњуз“ во анализата.
Постојат два главни начини на кои луѓето стануваат двојазични: или со раѓање во двојазично семејство или со учење втор јазик на училиште – или дури подоцна во животот, на пример додека патуваат.
Експертите се согласуваат дека колку побрзо се научи странскиот јазик, толку е полесно да се совлада.
