Во вашето експозе, премиере, вие не дадовте одговор на прашањето, велите, за мене, оваа реконструкција на Владата не е мотивирана од имиња и презимиња. Па јас мислам дека не може секој да биде министер, колку се посилни имињата, толку е посилна и Владата. Понатаму, велите денешните одлуки не се мотивирани од теснопартиските интереси, ниту една партија, сегашните или идните. Не, со ова се носи заклучок дека никој не е важен и никој не е соодветен и секој ќе биде употребуван како чифт чорапи секојпат кога личните интереси и перспективи ќе налагаат за тоа. Тотално погрешно. Велите исто така дека за вас овие одлуки не се врзани и не смее да бидат поврзани со желбите, мотивите и барањата на кое било партиско раководство. Е, овде сте во колизија не само со она што го гледаме деновите, туку последните 6 години“, рече пратеничката од ВМРО-ДПМНЕ, Иванка Василевска, од собраниската говорница на денешната седница.
Василевска праша дали министерот за информатичко општество, бидејќи не е коруптивен, е тргнат од владиниот кабинет.
„Дали министерот за информатичко општество затоа што не бил коруптивен, бил професионалец и сработил за таа година колку што можел да сработи не е подобен и вака насилнички го тргате од владиниот кабинет“, праша таа.
Василевска смета дека Владата воопшто не треба да прави реконструкција, туку треба да го распушти Собранието и да се излезе на предвремени парламентарни избори.
Сето ова изгледа навистина како една голема папазјанија и не дава шанса, ниту надеж дека оваа Влада треба воопшто да врши реконструкција, туку единственото нешто што може да се направи, и тоа во договор помеѓу сите нас, е да се прогласи распуштање на Собранието и да одиме на избори, му порача Василевска на Ковачевски.
