Трговскиот биланс на Швајцарија за 2022 година покажа четвртина помал суфицит од претходната година, бидејќи увозот пораснал многу повеќе од извозот, покажаа денеска податоците на Федералната царинска управа.
Трговскиот суфицит од размената на Швајцарија со светот минатата година изнесувала 43,5 милијарди швајцарски франци (47,3 милијарди долари) и бил за 25,6 отсто помал од 2021 година.
Извозот реално пораснал за само 0,1 отсто, по скокот од 9,5 отсто во 2021 година.
Номинално, извозот е зголемен за 7,2 отсто, поддржан од постојано зголемување на цените, а увозот за дури 16,8 отсто, покажуваат податоците на царинската управа. Послабиот раст на извозот во 2022 година во голема мера го одразува падот на извозот на возила од 6,9 проценти. Намалени се и испораките на хемикалии и лекови и тоа за 4,4 отсто.
Растот на извозот на накит нагло забави, на 21,3 отсто, од 38 отсто во претходната година, што значително се одрази на вкупните извозни резултати во 2022 година.
Во последните три месеци од минатата година, вкупниот трговски суфицит е намален за 11,3 отсто во однос на претходните три месеци и се лизна на 7,1 милијарди франци. Истовремено, извозот е намален реално за 1,8 отсто, а увозот за 0,4 отсто.
На самиот крај на годината закрепна извозот и бележи пораст од 5,7 отсто во однос на ноември кога бележи пад од 2,7 отсто. Увозот, пак, е зголемен за првпат по три месеци и е за 0,3 отсто поголем во однос на ноември.
Извозот на часовници скокна за 5,8 отсто на годишно ниво во декември и ја скрши границата од две милијарди франци, што никогаш претходно не се случило на крајот на годината, покажаа податоците од Швајцарската асоцијација за индустрија на часовници.
Во цела 2022 година, Швајцарија извезла часовници во вредност од 24,8 милијарди франци, што е за 11,4 отсто повеќе од претходната година, објави здружението.
