Анкара ја откажа претстојната посета на шведскиот министер за одбрана Пал Јонсон на Турција, како одговор на дозволата на Шведска за денешното планирано палење на Куранот, исламската света книга, во близина на турската амбасада во Стокхолм.
„Со жалење сме сведоци дека не е преземена никаква акција како резултат на овие гнасни и грозоморни дела против Турција и нашиот претседател Реџеп Таип Ердоган. Затоа, во овој момент, посетата на шведскиот министер за одбрана Јонсон на Турција на 27 јануари стана бесмислена. Затоа ја откажавме посетата“ изјави турскиот министер за одбрана Хулуси Акар вчера пред новинарите по состанокот на НАТО во воздухопловната база Рамштајн во Германија, пренесува Анадолија.
Потегот кој го најави Акар дојде откако Расмус Палудан, лидерот на данската екстремно десничарска партија Страм Курс, доби дозвола да запали Куран денеска пред турската амбасада во Стокхолм, јавува турската агенција.
Шведскиот министер за надворешни работи, Тобијас Билстром, претходно изрази загриженост дека дозволувањето на овие демонстрации ризикува дополнително да го одложи ратификацијата на Анкара на шведската кандидатура за НАТО. Тој, исто така, додаде дека сепак би било „многу несоодветно“ на лице да му се ускрати правото на протест.
Шведска и Финска поднесоа барање за влез во НАТО во мај, а Турција и Унгарија се единствените земји од Алијансата кои сè уште не го одобрија нивниот пристап.
