Актерот Џереми Ренер имаше несреќа чистејќи го снегот на 1 јануари, по што итно беше префрлен во болница во Рено, Невада, а сега им се обрати на своите фанови со објава на „Инстаграм“.
„Ви благодарам за убавите зборови. Во моментов не сум во можност за типкање, но на сите ви испраќам љубов“, напиша актерот покрај фотографијата направена во болнички кревет, а многу колеги како Крис Хемсворт, Кејт Бекинсејл, Кејт Хадсон и Крис Еванс во коментарите му посакаа брзо закрепнување.
Според „Дејли мејл“, кој ја цитира градоначалничката на Рено, актерот му помагал на мотоциклист кој останал заглавен во снегот кога бил повреден од плуг.
„Во неделата, на 1 јануари, Ренер се обидувал да му помогне на возачот кој бил заглавен пред куќа на снежната страна на планината кога го прегази сопственото возило“, изјави градоначалничката Хилари Шив. Во несреќата актерот се здобил со сериозни повреди , но сега е во стабилна состојба.
Извор близок до актерот открил за Си-ен-ен дека актерот досега имал две операции и дека повредите се сериозни.
