Секретарот на Белорускиот совет за безбедност денеска изјави дека е „малку веројатно“ украинската ракета соборена вчера случајно да навлезе во белорускиот воздушен простор, пренесе руската државна агенција РИА.
Во интервју за рускиот весник „Спутник Белорусија“, тој функционер исто така изјави дека веројатно има некаква „намера“ зад неговото лансирање.
Белоруската државна новинска агенција БелТА објави дека украинска противвоздушна ракета С-300 паднала на територијата на Белорусија во четвртокот за време на еден од најголемите руски ракетни напади врз Украина од почетокот на војната. Белоруското Министерство за одбрана соопшти дека украинската ракета е соборена од белоруската противвоздушна одбрана.
БелТА објави дека проектилот што паднал во Белорусија потекнува од украинска територија. Таа објави фотографија за која тврди дека покажува делови од ракета С-300 на празно земјоделско земјиште.
