Владимир Путин го одржуваат во живот странски лекари и покрај санкциите од Западот што му беа наметнати на него и на неговиот режим. Лекарите ги користат најновите западни третмани за да го таргетираат неговиот рак и да го спречат неговото ширење, но тој веројатно сега е во последната година на власт.
Ова го вели рускиот историчар и политички аналитичар, Валериј Соловјев, пренесува „Дејли мејл“.
„Можам да кажам дека без овој третман тој дефинитивно не би бил во јавниот живот во Руската Федерација“, рече Соловјев и додаде дека Путин ги користи најнапредните третмани и таргетираната терапија што Русија не може да му ги обезбеди.
„Би рекол дека третманот беше премногу успешен. Премногу добро се однесуваа кон него. И покрај ова, крајот е веќе на повидок, дури и според лекарите кои го спроведуваат овој третман, бидејќи ниту еден лек не може да биде бескрајно успешен” – тврди историчарот.
Како што вели тој, планот на Путин е да му ја предаде власта на помалку познатиот руски министер за земјоделство Дмитриј Патрушев (45), син на неговиот близок и моќен главен помошник за безбедност Николај Патрушев (71), жестоко антизападен поранешен шеф на ФСБ и клучен архитект на војната во Украина.
Според него, друг можен наследник е Алексеј Дјумин (50), поранешен телохранител на Путин и поранешен заменик министер за одбрана.
Соловјев е поранешен професор на престижниот московски Институт за меѓународни односи [МГИМО], школа за обука за шпиони и дипломати, кој долго време тврди дека знаел за здравјето на Путин.
Тој тврди дека рускиот претседател првично боледувал од рак на дебелото црево кој се проширил и дека е „поопасен сега“, и дека лековите довеле до раните симптоми на Паркинсоновата болест.
„Тој има доста сериозни здравствени проблеми. Најсериозниот од нив е онкологијата. Стратегијата и тактиката на лекување беа дефинирани од лекари кои се надвор од Русија. Тие го оперираа во февруари 2020 година, набргу откако му беше дијагностицирана онколошка болест“, вели Соловјев.
Историчарот очекува дека 2023 година ќе биде последната година од владеењето на Путин, па дури и дека промената би можела да се случи веќе на пролет.
„Ако не си замине доброволно, ќе дејствуваат други луѓе. Путин сега ја има последната шанса, би рекол. Ако не ја искористи, елитите засекогаш ќе се одвратат од него. Ако зборуваме за наследникот, тоа е само една личност, само уште една личност, а тоа е Дмитриј Патрушев“, тврди историчарот, пишува „Дејли мејл“.
