Пратениците на Европскиот парламент ја разрешија од функцијата потпретседател на парламентот грчката пратеничка Ева Каили, која беше обвинета за корупција од белгиските власти.
За разрешување на обвинетата потпретседателка гласаа 625 од 628 пратеници. Хрватскиот пратеник Мислав Колакушиќ гласаше против разрешувањето на Каила, а двајца парламентарци беа воздржани, пишува „Јутарњи лист“.
Претходно во вторникот претседателката на парламентот Роберта Мецола објави дека Конференцијата на претседатели, парламентарно тело составено од претседатели на пратеничката група и претставник на независни пратеници, едногласно одлучи да му предложи на Европскиот парламент да го прекине потпретседателскиот мандат на пратеничката.
За одлуката за разрешување беше потребно двотретинско мнозинство од гласовите на пратениците.
Каили беше меѓу четворицата уапсени и обвинети во Белгија овој викенд поради наводите дека Катар ги поткупил за да влијаат на парламентарните одлуки. Таа негираше дека примила пари од Катар.
