Британското кралско семејство е советувано да нема никаков контакт со руската амбасада во Лондон, изјави рускиот амбасадор во Обединетото Кралство.
На прашањето на весникот „Известија“ дали имало каква било комуникација со кралот Чарлс Трети, рускиот амбасадор Андреј Келин одговори: „Не. Знам дека членовите на кралското семејство се советувани да не контактираат со руската амбасада“.
„Повеќето политичари на Запад се како некои еднодневни пеперутки кои не размислуваат за иднината и кои се опседнати со собирање бескорисни политички поени. Затоа не можат да разберат што ќе се случи за еден месец или една година со Украина“, рече Келин, пренесува „Скај њуз“.
„На крајот на краиштата, ако вака продолжи, Украина ќе стане пропадната држава, црна дупка која ќе треба да се закрпи. Руските бизнисмени, вклучително и таканаречените олигарси, не го сметаат Лондон за безбедно место. Никој сега не ги смета Обединетите Кралството за безбедно засолниште“, додаде тој.
